MİSA TÄRTIBI

BASTAPQY JORALAR

Kırıspe än aitu kezınen qahin (qasietker / dıni qyzmetker) men senuşıler özderıne aiqyş belgısın jasaidy; qahin jamağatqa nazar audaryp aitady:
Q. Äkenıñ, Ūlynyñ jäne Kielı Ruhynyñ atymen.
J. Aumin.
Sonan soñ qahin qoldaryn jaiyp jamağatty qarsy alady:
Q. İemız İsa Mäsıhtıñ raqymy, Qūdaidyñ süiıspenşılıgı jäne Kielı Ruhpen qarym-qatynastaryñ bärıñde bola bersın.
Nemese:
Q. Senderge Qūdai Äkemız jäne İemız İsa Mäsıh raqymyn jaudyryp, tynyştyq syilai bersın.
Nemese:
Q. İemız senderge jar bolsyn.
J. Ruhyñmen de bırge bolsyn.
«İemız senderge jar bolsyn» sälemdesuy ornyna beskıp (episkop) jamağatty kelesı sözdermen qarsy alady.
B. Senderge tynyştyq bolsyn.
J. Ruhyñmen de bırge bolsyn.

ÖKINU JORASY

Qahin senuşılerdı ökınu räsımın ötuge şaqyrady:
Q. Bauyrlastarym, osy Qasiettı Qūpialardy toilauğa qatysa aluymyz üşın künälarymyzdy moiyndaiyq.
Qysqa tynyştyq saqtalady, al sodan soñ jamağat senım sözderın bırge aitady:
Men Qūdırettı Qūdaidyñ aldynda da, * bauyrlastarymnyñ aldynda da * oiymmen, sözımmen, ısımmen * jäne jaqsylyq ıstemegenımmen * köp künä jasağanymdy moiyndaimyn.
Öz keudesın soğyp, aitady:
Menıñ kınäm! * Menıñ kınäm! * Menıñ zor kınäm!
Sosyn jalğastyrady:
Sondyqtan Bataly Märiam Mäñgıbikeştı, * barlyq perışteler men äulielerdı, * sondai-aq senderdı, bauyrlastarym, * Qūdai İemızge men üşın dūğa qylyñdar dep ötınemın.
Qahin jıberıletın dūğasyn oqidy:
Q. Qūdırettı Qūdai bızge raqym etıp, * künälarymyzdy keşırıp, * mäñgılık ömır bersın.
J. Aumin.
Nemese:
Qahin senuşılerdı ökınu räsımın ötuge şaqyrady:
Q. Bauyrlastarym, osy Qasiettı Qūpialardy toilauğa qatysa aluymyz üşın künälarymyzdy moiyndaiyq.
Uaqytşa tynyştyq ornalady. Sosyn qasietker aitady:
Q. Bızge raqym ete gör, ua, Jaratqan.
J. Bız Senıñ aldyñda künä jasadyq.
Q. Bızge tūraqty raqymyñdy tanyta gör, ua, Jaratqan.
J. Bızdı päleden saqtap, qūtqara gör.
Qahin jıberıletın dūğasyn oqidy:
Q. Qūdırettı Qūdai bızge raqym etıp, * künälarymyzdy keşırıp, * mäñgılık ömır bersın.
J. Aumin.
Nemese:
Qahin senuşılerdı ökınu räsımın ötuge şaqyrady:
Q. Bauyrlastarym, osy Qasiettı Qūpialardy toilauğa qatysa aluymyz üşın künälarymyzdy moiyndaiyq.
Uaqytşa tynyştyq ornalady. Sosyn qahin, dekın (diakon) ne basqa qyzmetşı «İemız, raqym ete gör» («Kyrie eleison») dūğasymen kelesı nemese basqa sözderdı aitady:
Q. Jaraly jürekterdı sauyqtyruğa tağaiyndalğan İemız, raqym ete gör.
J. İemız, raqym ete gör.
Q. Künäkarlardy terıs joldan qaituğa şaqyruğa kelgen Mäsıh, raqym ete gör.
J. Mäsıh, raqym ete gör.
Q. Äkesınıñ oñ jağynan oryn alyp, bız üşın ara tüsetın İemız, raqym ete gör.
J. İemız, raqym ete gör.
Qahin jıberıletın dūğasyn oqidy:
Q. Qūdırettı Qūdai bızge raqym etıp, * künälarymyzdy keşırıp, * mäñgılık ömır bersın.
Jamağat jauap beredı:
J. Aumin.
Eger ökınu räsımınıñ basqa tärtıbınde qoldanylatyn bolmasa, «İemız, raqym ete gör» («Kyrie eleison») ündeu sözder aitylady:
Q. İemız, raqym ete gör.
J. İemız, raqym ete gör.
Q. Mäsıh, raqym ete gör.
J. Mäsıh, raqym ete gör.
Q. İemız, raqym ete gör.
J. İemız, raqym ete gör.
Sosyn, belgılı bolsa, änūran jyrlanady nemese aitylady:
Joğaryda Qūdai madaqtalsyn, * jer betınde de ızgı niettı adamdarğa tynyştyq bolsyn. * Senıñ zor dañqyña bola * bız Senı madaqtaimyz, * Senı därıpteimız, * Sağan tabynamyz, * Senı qolpaştaimyz, * Sağan alğys aitamyz, * ua, Jaratqan İe, Aspan Patşasy, * ua, Qūdırettı Qūdai-Äke, * ua, jalğyz Ūly, İemız İsa Mäsıh, * ua, Täñır İe, Qūdaidyñ Toqtysy, Qūdai-Äkenıñ Ūly, * dünienıñ künäsın alyp qoiğan İemız, bızge raqym ete gör, * dünienıñ künäsın alyp qoiğan İemız, mınajatymyzdy qabyl ala gör, * Äkesınıñ oñ jağynda oryn alğan İemız, bızge raqym ete gör. * Tek Sen ğana Kielısıñ, * Sen ğana Jaratqan İesıñ, * Sen ğana Qūdai Tağalasyñ, ua, İsa Mäsıh, * Sen de Kielı Ruhpen bırge * Qūdai-Äkenıñ dañqyna ortaqtasa jüresıñ. * Aumin.

Osy änūran aiaqtalğan soñ qahin qusyrylğan qoldarmen aitady:
Q. Dūğa eteiık.
Ol barlyq qahindermen bırge bıraz uaqyt tynyştyqta dūğa etedı. Sosyn qahin qoldary jaiylyp kırıspe dūğasyn oqidy. Dūğa aiaqtalğan soñ:
Q. … Senımen bırge Kielı Ruhtyñ bırlıgınde mäñgı-baqi tırı bolyp, patşalyq qūratyn Senıñ Ūlyñ, Qūdai İemız İsa Mäsıh arqyly mūny sūraimyz.
jamağat jauap beredı:
J. Aumin.

SÖZ LİTURGİASY

Dauystap oquşy mınberge baryp, Bırınşı oqylymdy oqidy. Ony barlyq otyryp tyñdaidy. Dauystap oquşy aiaqtaluyn bıldıretın sözderdı aitady:
O. Qūdaidyñ Sözı.
J. Qūdaiğa alğys aitamyz.
Zabur jyry jyrlaityn nemese jyrşy Zabur jyryn jyrlaidy nemese oqidy; jamağat jauap beredı. Eger belgılense, dauystap oquşy Ekınşı oqylymdy mınberden oqidy. Dauystap oquşy aiaqtaluyn bıldıretın sözderdı aitady:
O. Qūdaidyñ Sözı.
J. Qūdaiğa alğys aitamyz.
Sonan soñ dekın ne qahin mınberge jaqyndap aitady:
Q. İemız senderge jar bolsyn.
J. Ruhyñmen de bırge bolsyn.
Q. (Matai / Marqa / Lūqa / Johan) jazğan Kielı Injılden oqylym.
J. İemızdı därıpteimız.
Injıl oqylym aiaqtalğan soñ, dekın ne qahin jarialaidy:
Q. İemızdıñ Sözı.
J. Mäsıhtı madaqtaimyz.
Uağyz bastalady.

Uağyz aiaqtalğan soñ, belgılengen kezde, Senım nyşany jyrlanady nemese aitylady:
Men bır Qūdaiğa senemın: * Ol Qūdırettı Äke, * aspan men jerdıñ, * közge körınetın * jäne körınbeitınnıñ Jaratuşysy. * Men jalğyz İemız İsa Mäsıhke de senemın: * Ol bar ğasyrlar būryn Äkesınen tuylğan * Qūdaidyñ jalğyz Ūly – * Qūdaidan Qūdai, * Jaryqtan Jaryq, * şynaiy Qūdaidan şynaiy Qūdai; * Ol jaratylmai tuylğan; Ol Äkesımen bırbolmysty; * Ol arqyly bärı de jaratylğan; * Ol bızdei adamdar üşın jäne qūtqaryluymyz üşın aspannan tüstı.
Kelesı sözder aitqanda “Adam bolyp keldı” [“homo factus est”] sözderge deiın barlyq bas iedı.
Ol Kielı Ruh pen Märiam Bikeş arqyly tänge ainalyp, * Adam bolyp keldı. * Ol Pontius Pilat tūsynda bız üşın Aiqyşqa şegelenıp, * azap şegıp kömıldı. * Ol Jazbalar boiynşa üşınşı künı ölımnen qaita tırıldı. * Ol aspanğa köterılıp, Äkesınıñ oñ jağynda oryn aldy. * Ol dañqqa bölenıp, tırını de, ölgendı de sottauğa qaita keledı; * Onyñ Patşalyğynyñ şegı bolmaidy. * Men Kielı Ruhqa da senemın: * Ol Jartqan men Ruhtandyruşy; * Ol Äke men Ūlynan kelıp tūr; * Ol Äke men Ūlymen bırge tabynuğa men madaqqa laiyq; * Ol paiğambarlar arqyly söilegen. * Men bırtūtas Kielı Katolik pen Elşılık Kılesesıne senemın. * Künälardyñ keşırıluıne bır ret ğana ötetın şomyldyru räsımın moiyndaimyn; * ölgenderdıñ qaita tırıluın jäne bolaşaq ömırdı kütıp jüremın. * Aumin.
Iznık-Ystambūl Senım nyşanyñ ornyna, äsırese Oraza jäne Päsıh kezeñınde, Rim Kılesesınıñ şomyldyru nyşany, iağni Elşılık (Apostoldyq) Senım nyşany, dep atalatyn paidalana alady.
Men Qūdaiğa senemın: * Ol Qūdırettı Äke, * aspan men jerdıñ Jaratuşysy. * Men Onyñ jalğyz Ūly * İemız İsa Mäsıhke de senemın:
Kelesı sözder aitqanda “Märiam Bikeş arqyly tuylğan” sözderge deiın barlyq bas iedı.
Ol Kielı Ruh arqyly tänge ainalğan,* Märiam Bikeş arqyly tuylğan; * Ol Pontius Pilat tūsynda azap şektı, * Ol Aiqyşqa şegelenıp, öldı de kömıldı; * Ol tozaqqa tüstı; * Ol üşınşı künı ölımnen qaita tırıldı; * Ol aspanğa köterılıp, * Qūdırettı Qūdai Äkenıñ oñ jağynda oryn aldy: * sol jaqtan Ol tırını de, ölgendı de sottauğa qaita keledı. * Men Kielı Ruhqa, * Kielı Katolik Kılesesıne, * äulielerdıñ qarym-qatynasuyna, * künälardyñ keşırıluıne, * tännıñ qaita tırıluıne, * mäñgılık ömırge senemın. * Aumin.
Jalpy dūğa (Senuşılerdıñ dūğasy) oqytylady.

EUHARİSTİA LİTURGİASY

Jalpy dūğadan (Senuşılerdıñ dūğasynan) keiın syi-tartulardy äkelu kezınde än aitu bastalady. Osy uaqytta ministranttar qūrbantaqtyñ üstıne Euharistia üşın barlyğyn ornalastyrady.
Qahin nanmen patenany alyp, kışkene köterıledı de kübırlep aitady:
Q. Ua, dañqqa bölengen Jaratqan İe, bükıl älemnıñ Qūdaiy, * jomarttyğyñnyñ arqasynda bız Sağan äkelgen osy nandy qabyldadyq: * ol jer men adamnyñ qol eñbegınıñ jemısı bolyp, * bız üşın ömır beretın Nan bolsyn.
Eger syi-tartulardy äkelu kezınde än aitylmasa, qahinge osy sözderdı qatty aituğa bolady; soñynda jamağat dauystap aitady:
J. Qūdai mäñgı-baqi därıptelsın.
Dekın ne qahin tostağanğa şarap pen su azğana qūiady. Sodan keiın qahin tostağandy alyp, ony qūrbantaqtyñ üstınen kışkene köteredı de kübırlep aitady:
Q. Ua, dañqqa bölengen Jaratqan İe, bükıl älemnıñ Qūdaiy, * jomarttyğyñnyñ arqasynda bız Sağan äkelgen osy şarapty qabyldadyq: * ol jüzım men adamnyñ qol eñbegınıñ jemısı bolyp, * bız üşın ruhani ışımdık bolsyn.
Eger yi-tartulardy äkelu kezınde än aitylmasa, qahinge osy sözderdı qatty aituğa bolady; soñynda jamağat dauystap aitady:
J. Qūdai mäñgı-baqi därıptelsın.
Syi-tartulardy äkelu men qoldardyñ däret aluynan keiın qahin jamağatqa nazar audaryp, aitady:
Q. Bauyrlastarym, * menıñ qūrbanym da, senderdıñ qūrbandaryñ da qūdırettı Qūdai Äkege ūnamdy bolsyn dep dūğa etıñder.
J. Jaratqan Öz esımınıñ dañqy men madağy üşın, * bızdıñ jäne Öz Kielı Kılesesınıñ igılıgı de üşın * osy qūrbandy senıñ qolyñnan qabyl alsyn.
Sodan soñ qahin syi-tartulardyñ üstınen dūğa etedı, sodan keiın jamağat jauap beredı:
J. Aumin.

II-EUHARİSTİA DŪĞASY

Qahin Euharistia dūğasyn oquğa bastaidy:
Q. İemız senderge jar bolsyn.
J. Ruhyñmen de bırge bolsyn.
Q. Jürekterımızdı biıkke kötereiık.
J. Solar İemızge köterılgen.
Q. Qūdai İemızge alğys aitaiyq.
J. Būl laiyqty da ädıl äreket.
Q. Ua, Kielı Äke, Senıñ süiıktı Ūlyñ ärı İemız İsa Mäsıh arqyly ärqaşan da, är jerde de Sağan körsetken rizaşylyğymyz – şynymen laiyqty da ädıl, paryzdy da qūtqaratyn äreket. Senıñ erkıñ boiynşa bärın jaratqan Sözıñ ärı Kielı Ruhtyñ qūdıretı arqyly tänge ainalyp, Päk Qyz arqyly düniege kelıp, bızge jıberılgen Qūtqaruşyz ben Qamqorşymyz – İemız İsanyñ Özı. Ol erkıñdı oryndap, Sağan bağyştalğan halyqty jinap alu üşın Aiqyş ağaşyna qolyn sozyp, azap şektı. Osylaişa İemız İsa ölımnıñ küşın joiyp, qaita tırılu keremetın jasady. Sondyqtan bız perışterler men bar äulielermen bırge saltanatty ūlylyğyñdy jarialap, bırauyzdan şaqyramyz:
Kielı, Kielı, Kielı, Älemnıñ İesı Qūdai! * Aspan men jer Senıñ saltanatty ūlylyğyña kenelgen. * Hosanna biıkte! Jaratqannyñ atyna kele jatqan därıptelgen. * Hosanna biıkte!
Qahin jaiylğan qoldarymen aitady:
Q. Ua, Jaratqan, Sen şynymen Kielısıñ, är qasiettılıktıñ Qainarysyñ.
Qoldaryn qusyrady, jäne syi-tartulardyñ üstınen jaiyp ūstap aitady:
Sondyqtan, şyq siaqty tüsken osy syi-tartulardy Kielı Ruhyñ arqyly qasiettı ete gör:
Qoldaryn qusyryp, nan men şarabyna aiqyş belgısın jasaidy da aitady:
solar bız üşın İemız İsa Mäsıhtıñ Tänı † men Qanyna ainalsyn.
Kelesı söilemşelerde İemızdıñ sözderı anyq etıp tüsınıktı aitylady:
Q. İemız İsa Öz erkımen azap şeguge berılgen kezde nandy alyp, Sağan şükırlık ettı de, nandy üzıp, şäkırtterıne berıp jatyp, bylai dedı:
MYNADAN BÄRIÑ DE ALYP JEÑDER, * ÖİTKENI BŪL – MENIÑ SENDER ÜŞIN * QŪRBANDYQQA BERMEK TÄNIM.
Jamağatqa qasiettı türde ainalğan Hostiany körsetedı, ony patenağa salady da tıze bügıp, oğan tabynady.
Sosyn jalğastyrady:
Q. Sondai-aq, keşkı astan keiın, tostağandy da alyp, Sağan qaita şükırlık ettı de, şäkırtterıne tostağandy berıp jatyp, bylai dedı:
MYNADAN BÄRIÑ DE ALYP IŞIÑDER, * ÖİTKENI BŪL – KÜNÄLARY KEŞIRILSIN DEP * KÖPTEGEN ADAMDAR ÜŞIN TÖGILIP, * JAÑA DA MÄÑGILIK KELISIMDI BEKITETIN MENIÑ QANYM. * MENI ESTERIÑE TÜSIRU ÜŞIN OSYLAİ ISTEÑDER.
Jamağatqa Tostağandy körsetedı, ony korporalğa qoidyrady da tıze bügıp, oğan tabynady.
Sosyn aitady:
Q. Senım qūpiasy.
J. Ua, İemız, Sen qaityp kelgenşe, bız Özıñnıñ qūrbandyq ölımıñdı jarialap, qaita tırılgenıñdı moiyndai beremız.
Nemese:
J. Ua, İemız, bız osylai Nan jep, Tostağannan ışken saiyn, Sen qaityp kelgenşe, Özıñnıñ qūrbandyq ölımıñdı jarialai beremız.
Nemese:
J. Ua, dünienı Qūtqaruşy, bızdı qūtqara gör, öitkenı Özıñ aiqyşqa şegelenıp, qaita tırılgenıñ arqyly bızdı azat ettıñ.
Nemese:
J. Mäsıh azap şegıp öldı, Mäsıh qaita tırıldı, Mäsıh qaita keledı.
Sodan soñ qahin jaiylğan qoldarymen aitady:
Q. Sondyqtan, ua, Jaratqan, bız İsanyñ ölımı men qaita tırıluın eske alyp, ömır syilaityn Nan men qūtqarylu syilaityn Tostağandy Sağan ūsynamyz. Bızdı Özıñnıñ aldyñda tūryp, Sağan qyzmet etuge laiyq dep tapqanyñ üşın Sağan alğys aitamyz. Bız tereñ qasterlep, Mäsıhtıñ Tänı men Qanynan alyp jegenımızde, Kielı Ruh arqyly tolyq bırlıkke jeteiık dep boisūnyp sūraimyz.
Ua, Jaratqan İe, bükıl jer jüzıne taratylğan Kıleseñdı esıñde saqtai gör. Bızdıñ Papamyz N(-ben / -men / -pen) ärı beskıbımız N(-ben / -men / -pen) bırge, jäne barlyq dıni qyzmetkerlermen bırge Kılesenı mınsız süiıspenşılıkke jetelei gör.
Qaita tırıluıne ümıttenıp ölgen bauyrlastarymyzdy ärı Senıñ raqymyña bölenıp qaitys bolğandardy da esıñe ala gör: solardyñ barlyğyna bet-jüzıñnıñ nūryn tögıp, aldyña äkele gör. Mäñgılık ömırımızge ie boluğa laiyq dep tabylyp, Senı madaqtap, därıpteu üşın Qūdaidyñ qasiettı Anasy Äulie Märiam Bikeşpen, özınıñ qadırlı küieuı Jüsıppen, İemızdıñ qasiettı Elşılerımen jäne äu bastan berı Özıñe ūnamdy bolğan barlyq Äulielermen bırge de bärımızge raqym etuıñdı Senıñ Ūlyñ İsa Mäsıh arqyly sūraimyz.
Qahin Hostiamen patena men tostağandy alyp, köteredı de aitady:
Q. Mäsıh arqyly da, * Özımen bırge de, Özınıñ boiynda da, * Sağan, ua, Qūdırettı Qūdai Äke, * Kielı Ruhtyñ bırlıgınde * mäñgı-baqi barlyq ızet pen madaq bolsyn.
J. Aumin.
Keiın Kielı Qatynasu jorasy bastalady.

KİELI QATYNASU JORASY

Patena men tostağandy qoiyp, aitady:
Q. Bız qūtqarylu syilaityn ösiettermen ruhtandyryp, * Qūdaidyñ tälımın qabyldap, * nyq senımmen mynany aita alamyz:
jäne jamağatpen bırge jalğastyrady:
Aspandağy Äkemız, * Senıñ atyñ qasiettelsın, * Patşalyğyñ kelsın, * Senıñ erkıñ aspandağydai * jer betınde de oryndalsyn. * Qajettı nanymyzdy bügınge bere gör; * bızge qaryz bolğandardy keşırgenımızdei, * bızdıñ qaryzymyzdy da keşıre gör; * azğyryluymyzğa jol bermei, * bızdı jamandyqtan saqtai gör.
Qahin özı jalğystyryp aitady:
Q. Ua, Jaratqan, bızdı türlı jamandyqtan saqtap, qazırgı zamanymyzda amandyq pen tynyştyq ornatyp sala gör, sonda bız Senıñ meiırımdılıgıñnen küş jiıp, künälarymyzdan arylyp, türlı abyrjudan saqtalğanymyzda keremet ümıtımızdıñ ıske asuyn ärı Qūtqaruşymyz İsa Mäsıhtıñ qaita keluın kütıp jatatyn bolamyz.
J. Öitkenı Patşalyq ta, qūdıret te, dañq ta mäñgı-baqi Senıkı.
Sodan soñ qahin aitady:
Q. Ua, İemız İsa Mäsıh, Sen Elşılerıñe: * “Men senderge tynyştyq syilaimyn, * Özımnıñ tynyştyğymdy beremın”, – dep aittyñ. * Künälarymyzdy eskermei, alaida Özıñnıñ Kıleseñ bıldıretın senemıne köz audaryp, * erkıñ boiynşa Kılesege tatūlyq pen bırlıgın syilai gör. * Öitkenı Sen mäñgı-baqi tırı bolyp, patşalyq qūrasyñ.
J. Aumin.
Qahin jalğastyrady:
Q. İemızdıñ tynyştyğy bärıñde bola bersın.
J. Ruhyñmen de bırge bolsyn.
Sodan soñ dekın ne qahin qosady:
Q. Bır-bırıne tynyştyq tıleñder.
Jergılıktı ädet-ğūryptar boiynşa barlyq adamdar tynyştyq, ızgılık jäne meiırım belgısın bıldıredı; qahin beibıtşılık belgısın dekınge ne qyzmetşıge bıldıredı. Sodan soñ qahin Hostiany alyp, patenanyñ üstınde ony syndyrady da bölşektı tostağanğa tüsırıp, aqyryn aitady:
Dünienıñ künäsın alyp qoiğan * Qūdaidyñ Toqtysy, * bızge raqym ete gör.
Dünienıñ künäsın alyp qoiğan * Qūdaidyñ Toqtysy, * bızge raqym ete gör.
Dünienıñ künäsın alyp qoiğan * Qūdaidyñ Toqtysy, * bızge tynyştyq syilai gör.
Qahin Hostiany alady, ony patena ne tostağannyñ üstınen kışkene köterıp, jamağatqa nazar audaryp, qatty aitady:
Q. Mıne, * dünienıñ künäsın alyp qoiğan Qūdaidyñ Toqtysy. * Toqtynyñ toiyna şaqyrylğandar baqytty!
J. Ua, İem, * baspanama Senıñ kıruıñe laiyq emespın, * tek bır söz aitsañ, * menıñ jüregım jazylady.
Qahin Mäsıhtıñ Tänı men Qanyna qabyldap qatynasady. Sodan soñ ol özı ne dekın jamağatqa Qatynasu ülestıredı. Qahin är qatynasatyn adamğa jaqyndap aitady:
Q. Mäsıhtıñ Tänı. (nemese Mäsıhtıñ Qanyna da qatynasu kezınde: Q. Mäsıhtıñ Tänı men Qany.)
Qatynasatyn adam jauap beredı:
Aumin.
Kielı Qatynasu ülestıruın aiaqtap, qahin, dekın ne akolit, tostağannyñ üstınen patena men tostağandy özı de tazalaidy. Qasiettı tynyştyq pen euharistialyq än aituy aiaqtalğan soñ ol jamağatty dūğa etuge şaqyrady:
Q. Dūğa eteiık.
Barlyq adamdar, eger aldynda bolsa, qahinmen bırge tynyştyqta dūğa etedı. Kielı Qatynasudan keiın qahin jaiylğan qoldarymen dūğa etedı, al jamağat jauap beredı:
J. Aumin.

QORYTYNDY JORA

Qahin jamağatqa nazar audaryp, qol jaiyp aitady:
Q. İemız senderge jar bolsyn.
J. Ruhyñmen de bırge bolsyn.
Q. Qūdırettı Qūdai † Äke, Ūl jäne Kielı Ruh senderdı jarylqasyn.
J. Aumin.
Keibır künderı ne belgılı jağdaida osy bata beru tärtıbınıñ aldyñda, aidarğa säikes, basqa saltanatty bata beru tärtıbı nemese jamağat üşın Dūğa bolyp ötedı. Pontifikal Misada basqaruşy mitrany kiıp jäne qoldaryn jaiyp, aitady:
B. İemız senderge jar bolsyn.
J. Ruhyñmen de bırge bolsyn.
B. Jaratqannyñ esımı därıptele bersın.
J. Qazırgı kezden mäñgılıkke deiın därıptele bersın.
B. Medetımız Jaratqannyñ esımınde.
J. Ol aspan men jerdı jaratty.
B. Qūdırettı Qūdai Äke, † Ūl † jäne Kielı † Ruh senderdı jarylqasyn.
J. Aumin.
Sodan keiın dekın nemese qahin özı qusyrylğan qoldarymen jamağatqa nazar audaryp, aitady:
Q. Baryñdar, Misa oryndaldy.
J. Qūdaiğa alğys aitamyz.