MÜQƏDDƏS MESSA
BAŞLANĞIC AYİNLƏR
Başlanğıc ilahi zamanı keşiş qurbangaha doğru gedir, onu öpür və xaç nişanı çəkərək deyir:
K. Ata, Oğul və Müqəddəs Ruhun adı ilə.
M. Amin.
K. Rəbb Sizinlə olsun.
M. Və sənin ruhunla.
TÖVBƏ AYİNİ
Keşiş və ya diakon qısaca möminləri Messanın o günə olan mövzusu ilə tanış edir. Günündən və ya fəslindən asılı olaraq, keşiş möminləri tövbə etməyə dəvət edir və aşağıdakı formalardan birini deyir.

K., M. Hər şeyə qadir Allaha və sizə, bacılarım və qardaşlarım, etiraf edirəm ki, öz təqsirimdir ki, fikirlərimdə və sözlərimdə, hərəkətlərimlə və borcumu yerinə yetirməməklə çox günah etmişəm.
Möminlər sinələrinə üç dəfə vuraraq, deyirlər:
Mənim təqsirimdir, mənim təqsirimdir, mənim böyük təqsirimdir.
Buna görə Müqəddəs, Həmişə-Bakirə Məryəmdən, bütün Mələklərdən və Müqəddəslərdən və sizdən, bacılarım və qardaşlarım xahiş edirəm ki, mənim üçün Rəbbimiz Allaha dua edəsiniz.
K. Hər şeyə qadir Allah bizə rəhm etsin, günahlarımızı bağışlasın və bizi ebədi həyata qovuşdursun.
M. Amin.
Ya da:
K. Peşman olmuş və kədərli ürəkləri sağaltmaq üçün gəldin ya Rəbb, bizə rəhm et.
M. Ya Rəbb, bizə rəhm et.
K. Günahkarları xilasa çağırmaq üçün gəldin Məsih, bizə rəhm et.
M. Məsih, bizə rəhm et.
K. Bizim havadarımız olaraq Atanın sağında əyləşən Rəbbimiz, bizə rəhm et.
M. Rəbbimiz, bizə rəhm et.
K. Hər şeyə qadir Allah bizə rəhm etsin, günahlarımızı bağışlasın və bizi ebədi həyata qovuşdursun.
M. Amin.

Əgər Tövbə ayininin başqa bir formulunda istifadə olunmayıbsa, «Rəbb, bizə rəhm et» («Kyrie, eleison») duaları ardınca gəlir:
K. Rəbb, bizə rəhm et.
M. Rəbb, bizə rəhm et.
K. Məsih, bizə rəhm et.
M. Məsih, bizə rəhm et.
K. Rəbb, bizə rəhm et.
M. Rəbb, bizə rəhm et.
Sonra, əgər təyin olunarsa, himn oxunur («Gloria in excelsis»):
Göylərdəki uca Allaha həmd olsun və yer üzündəki xoş məramlı insanlara sülh gəlsin. Səni tərif edirik. Səni ucaldırıq. Qarşında diz çökürük. Sənə həmd edirik. Uca Allah, göyün Hökmdarı, hər şeyə qadir Ata, ey Allahımız, uca Əzəmətin üçün Sənə şükür edirik. Rəbb İsa Məsih, Yeganə Oğul, Rəbb Allah, Allahın Quzusu, Atanın Oğlu, dünyanın günahlarını təmizləyən Sən, bizə rəhm et; dünyanın günahlarını təmizləyən Sən, dualarımızı qəbul et; uca Allahın sağında əyləşən Sən, bizə rəhm et. Çünki yalnız Sən müqəddəssən, yalnız Sən Rəbbimizsən, yalnız Sən uca Allahsan. Ey Məsih İsa, Müqəddəs Ruhun birliyində Ata Allahın izzətindəsən. Amin.
Bu himnin sonunda keşiş əllərini çarpazlayaraq deyir:
K. Dua edək.
Hamı bir müddət səssiz dua edir. Sonra keşiş Kolekta duasını oxuyur və onu bu sözlərlə bitirir:
K. ... Müqəddəs Ruhun birliyində Səninlə yaşayan və hökm sürən, Oğlunun, Rəbbimiz İsa Məsihin vasitəsilə, əbədi Allah.
M. Amin.
SÖZ LİTURGİYASI

Daha sonra oxucu minbərə çıxır və hamının oturarkən dinlədiyi Birinci Oxunu oxuyur.

Oxumanın bitməsini qeyd etmək üçün oxucu elan edir:

O. Bu Allahın Kəlamıdır.

M. Allaha şükürlər olsun.

Xor ifaçısı və ya kantor məzmuru deyir ya da oxuyur, möminlər isə məzmurun nəqarətini təkrar edir.

Sonra, İkinci Oxunuş təyin olunarsa, oxucu yuxarıda göstərildiyi kimi onu ambodan oxuyur. Oxumanın yekununu qeyd etmək üçün oxucu elan edir:

O. Bu Allahın Kəlamıdır.

M. Allaha şükürlər olsun.

Diakon ya da Keşiş kürsü tərəfə gedir və deyir:

K. Rəbb sizinlə olsun.

M. Və sənin ruhunla.

K. Müqəddəs (Mattanın / Markın / Lukanın / Yəhyanın) Müjdəsindən İsa Məsihin sözləri.

M. Şan-şərəf Rəbbindir.

Müjdəni oxuyub qurtardıqdan sonra Kəlamı oxuyan deyir:

K. Bu Rəbbin Kəlamıdır.

M. Rəbb İsa Məsih, Sənə həmd olsun.

Keşiş moizə oxuyur.
Aşağıdakılar, əgər varsa, İmanın etirafı (İman rəmzi / Credo) oxunur və ya oxunur:
İman edirəm – bir tək Allaha inanıram. Yerin və göyün, görünən və görünməyən bütün varlığları yaradan, Külli-İxtiyar Ata Allaha inanıram. Əzəldən Atadan dünyaya gəlmiş, Allahın yeganə Oğlu, bir tək Rəbb olan Məsih İsaya inanıram. O, Allahdan Allah, Nurdan Nur, Həqiqi Allahdan Həqiqi Allahdır. O, doğulmuş, lakin yaradılmamışdır, Ata ilə eynidir və hər şey onun vəsitəsi ilə yaradılmışdır. Biz, insanlara görə və bizi xilas etmək naminə göydən enmiş,
Aşağıdakı sözlərdə “insan olmuşdur” [“factus est”]-ə qədər hər kəs təzim edir.
Müqəddəs Ruhun qüdrətilə Bakirə Məryəmdən Vücüd alıb insan olmuşdur. Pontius Pilatus vaxtında bizim üçün acı çəkərək çarmıxa çəkilmiş, ölmüş, dəfn edilmiş və Müqəddəs Yazılara görə üç gündən sonra dirilmişdir. Göyə çıxmış və Atanın sağında oturmaqdadır. Diriləri və ölüləri mühakimə etmək üçün təkrar gələcək və Onun padşahlığı heç vaxt sona çatmayacaqdır. Peyğəmbərlər vasitəsi ilə danışmış olan Ata və Oğuldan gələn, Ata və Oğul ilə birlikdə sitayiş edilən və ucaldılan, həyatın qaynağı və Rəbb olan, Müqəddəs Ruha inanıram. Bir olan, Müqəddəs, Ümumdünya (Katolik) və Həvari Kilsəsinə inanıram. Günahların əfv edilməsi üçün tək bir vəftizi qəbul edirəm, ölülərin dirilişini və əbədi həyatı gözləyirəm. Amin.

Ya da: Həvarilərin Kredosu.
İman edirəm. Yeri və göyü yaradan Külli-ixtiyar Ata Allaha ve Onun Yeganə Oğlu,
Aşağıdakı sözlərdə “Bakirə Məryəmdən doğulmuş” qədər hər kəs təzim edir.
Müqəddəs Ruhdan döllənmiş, Bakirə Məryəmdən doğulmuş, Ponti Pilatın hökmü altında əzab çəkmiş, çarmıxa çəkilmiş, ölmüş və dəfn olunmuş, ölülər aləminə enmiş, üçüncü gün dirilmiş, göylərə qalxmış, külli-ixtiyar Ata Allahın sağında əyləşmiş, oradan diriləri və ölüləri mühakimə etməyə gələcək, Rəbbimiz İsa Məsihə iman edirəm. Müqəddəs Ruha, Müqəddəs Ümumdünya (Katolik) Kilsəsinə, müqəddəslərin ünsiyyətinə, günahların bağışlanmasına, bədənin dirilməsinə, əbədi həyata iman edirəm. Amin.

Möminlərin duası.
EVXARİSTİYA LİTURGİYASI
Möminlərin duası sonra Evxaristiya üçün himn oxunur. Bu müddət ərzində keşişlər qurbangahda Evxaristiya üçün lazım olan hər şeyi hazırlayırlar. Keşiş üstündə çörək olan qabı yuxarı qaldıraraq, deyir:
K. Ey Rəbbimiz, bütün kainatın Tanrısı, Sən xeyir-dualısan, çünki Sənin səxavətin sayəsində biz torpağın bəhrəsi və insan zəhmətinin səmərəsi olan bu çörəyi almışıq. Onu Sənə təqdim edirik ki, bizim üçün həyat çörəyi olsun.
Əgər Hədiyyələrin Təqdim Edilməsi üçün himn oxunmazsa, keşiş bu sözləri ucadan tələffüz etməyə icazə verilir. Sonda möminlər cavab verə bilərlər:
M. İndi və həmişə Allaha şükür edək.
Dyakon və ya keşiş qədəhə şərab və bir az su tökür. Sonra keşiş qədəhi götürür, iki əlində tutur və qurbangahın üstündən bir az yuxarı qaldıraraq alçaq səslə deyir:
K. Ey Rəbbimiz, bütün kainatın Tanrısı, Sən xeyir-dualısan, çünki Sənin səxavətin sayəsində biz üzüm tənəğinin meyvəsi və insan zəhmətinin səmərəsi olan şərabı almışıq. Onu Sənə təqdim edirik ki, bizim üçün ruhani içəcək olsun.
Əgər Hədiyyələrin Təqdim Edilməsi üçün himn oxunmazsa, keşiş bu sözləri ucadan tələffüz etməyə icazə verilir. Sonda möminlər cavab verə bilərlər:
M. İndi və həmişə Allaha şükür edək.
Qurbangahın qarşısında ortada dayanaraq, üzünü möminlərə tutaraq keşiş deyir:
K. Qardaşlarım və bacılarım, Allah, hər şeyə qadir Ata mənim və sizin qurbanınızı qəbul etməsi üçün dua edin.
M. Allah Öz adının ucalığına və şanına, bizim və Bütün Müqəddəs Kilsəsinin rifahı üçün əllərindən bu qurbanı qəbul etsin.
Sonra keşiş əllərini açaraq Qurbanlar üçün dua edir və sonunda insanlar ucadan deyirlər:
M. Amin.
EVXARİSTİYA DUASI
K. Rəbb sizinlə olsun.
M. Və sənin ruhunla.
K. Qəlblərimizi yüksəldək.
M. Qəlblərimiz Rəbb ilədir.
K. Rəbbimiz Allaha şükür edək.
M. Bu doğru və adildir.
Keşiş o günə aid olan Prefasiya duasını oxuyur və sonra möminlər ilə birlikdə «Müqəddəs» («Sanctus») himnini oxuyur.
Müqəddəs, Müqəddəs, Müqəddəsdir, Rəbbimiz, kainatın Allahı. * Göylər və yer Sənin şanınla doludur. * Hosanna səmalardakı uca Allaha. * Rəbbin adı ilə gələn xeyir-dualıdır. * Hosanna səmalardakı uca Allaha.
Keşiş bütün Evxaristiya duasını və çörəyin və şərabın Məsihin Bədəninə və Qanına çevrilməsini yerinə yetirir. Çörək və şərabın təqdis edilməsindən sonra keşiş deyir:
K. İmanın sirridir.
M. Rəbbimiz, Sənin ölümünü elan edirik, dirilişini etiraf edirik və şanlı gəlişini gözləyirik.
Keşiş Evxaristiya Duasını davam etdirir. Liturgiyanın bu hissəsinin sonunda möminlər cavab verirlər:
M. Amin.
Birləşmə (Evxaristiya) Ayini.
BİRLƏŞMƏ (EVXARİSTİYA) AYİNİ
K. Xilasedici əmrlərdən öyrənərək və ilahi nəsihətlərdən ruhlanaraq, cəsarətlə deyirik:

Ey göylərdə olan Atamız! * Adın Müqəddəs tutulsun, * Sənin Səltənətin gəlsin, * göydə olduğu kimi, * yerdə də Sənin iradən olsun. * Gündəlik çörəyimizi bizə bu gün ver; * və bizə borclu olanları * bağışladığımız kimi, * bizim borclarımızı da bağışla. * Və bizi sınağa çəkmə, * lakin bizi şərdən xilas et.
Doksologiya:
K. Rəbbimiz, bizi hər cür şərdən qurtar və günlərimizi əmin-amanlıqla keçirməyimizi bizə nəsib et ki, mərhəmətinin köməyi ilə Xilaskarımız İsa Məsihin gəlişini sevinclə və ümidlə gözləyən bizlər, həmişə günahdan azad olaq və hər cür təlaşdan uzaq olaq.
M. Çünki Səltənət, qüdrət və izzət * əbədi olaraq Sənindir!
Sülh nişanı:
K. Rəbbimiz İsa Məsih, həvarilərinə “Sizlərə sülhümü qoyuram, sizlərə sülhümü verirəm” dedin. Günahlarımıza deyil, Kilsənin imanına bax və Öz iradənlə ona sülh və birlik nəsib et. Çünki Sən əbədiyyən varsan və hökm edirsən.
M. Amin.
K. Rəbbin sülhü həmişə sizinlə olsun.
M. Və sənin ruhunla.
Sonra, lazım gələrsə, diakon və ya keşiş əlavə edir:
K. Bacılarım və qardaşlarım, bir-birimizi sülh nişanı ilə salamlayaq.
Yerli adət-ənənələrə görə hər kəs bir-birinə sülh, ünsiyyət və sevgi əlaməti ifadə edir, bundan sonra hər kəs mahnı oxuyur:
Üzərinə dünyanın günahlarını götürən Allahın Quzusu, * bizə mərhəmət et.
Üzərinə dünyanın günahlarını götürən Allahın Quzusu, * bizə mərhəmət et.
Üzərinə dünyanın günahlarını götürən Allahın Quzusu, * bizə sülh ver.
Keşiş Müqəddəs Çörəyi götürür, onu stəkanın və ya qədəhin üstündən bir az qaldırır və möminlərə tərəf dönüb deyir:
K. Budur dünyanın günahlarını Öz üzərinə götürən Allahın Quzusu. * Quzunun süfrəsinə dəvət edilənlər nə bəxtiyardır.
Н. Rəbbim, mən layiq deyiləm ki, Sən evimə gələsən, * lakin yalnız Sənin bir kəlmən ilə qəlbim sağalacaq.
Keşiş Məsihin Müqəddəs Bədənini və Qanını qəbul edir. Bundan sonra keşiş kasanı götürərək möminlərə yaxınlaşır. Çörəyi bir qədər yuxarı qaldıraraq Evxaristiyanı qəbul edən hər bir möminə deyir:
K. Məsihin Bədəni. (Və ya iki növ altında: K. Məsihin Bədəni və Qanı.)
M. Amin.
Evxaristiyadan sonra keşiş, diakon və ya akolit liturgiya qablarını təmizləyir. Sonra qurbangahın və ya mərasim iştirakçısının yerində dayanan keşiş əllərini çarpazlayaraq xalqa müraciət edərək deyir:
K. Dua edək.
Keşiş tərəfindən deyilən duadan sonra möminlər cavab verir:
M. Amin.
TAMAMLAYICI AYİN
K. Rəbb sizinlə olsun.
M. Və sənin ruhunla.
K. Hər şeyə qadir Allah – † Ata, Oğul və Müqəddəs Ruh sizə xeyir-dua versin.
M. Amin.
Sonra dyakon və ya keşişin özü əllərini çarpazlayıb xalqa tərəf dönüb deyir:
K. Sülh ilə gedin.
M. Allaha şükürlər olsun.